নতুনকৈ বনোৱা ৱিশ্ববিদ্যালয় অনুদান আয়োগ (UGC)ৰ নিয়মাৱলীত পৰৱৰ্তী সময়ত কোনো পৰিবর্তন কৰা নহ’ব বুলি প্ৰধানমন্ত্ৰী নৰেন্দ্ৰ মোডীৰ মন্তব্য বুলি দাবী কৰা এখন গ্ৰাফিক সামাজিক মাধ্যমত ভাইৰেল হৈ পৰিছে। ২০২৬ চনত প্ৰৱৰ্তিত এই নিয়মাৱলীবোৰ উচ্চ শিক্ষা ক্ষেত্ৰত বৈষম্য দূৰ কৰি সমতা প্ৰচাৰ কৰাৰ লক্ষ্যৰে প্ৰণয়ন কৰা হৈছিল। অৱশ্যে, সম্ভাৱ্য অপব্যৱহাৰ আৰু অস্পষ্টতাৰ অভিযোগ উত্থাপন কৰি বিভিন্ন গোটে ইয়াৰ বিৰুদ্ধে আপত্তি জনাইছে।
ওপৰৰ পোষ্টটো ইয়াত (আৰ্কাইভ) চাব পাৰিব
নিউজ মোবাইলৰ পৰীক্ষণ
নিউজ মোবাইলে ভাইৰেল পোষ্টটোৰ সন্দৰ্ভত অনুসন্ধান কৰি পোষ্টটো ভুৱা বিভ্ৰান্তিকৰ বুলি প্ৰমাণ কৰে।
নিউজ মোবাইলৰ দলে প্ৰথমতে মূল শব্দ ব্যৱহাৰ কৰি অনুসন্ধান কৰাত প্ৰধানমন্ত্ৰী নৰেন্দ্ৰ মোডীৰ দ্বাৰা নতুন UGC নিয়মাৱলী সন্দৰ্ভত কোনো নিৰ্ভৰযোগ্য সংবাদ প্ৰতিবেদন বা চৰকাৰী বক্তব্য সন্দৰ্ভত ইণ্টাৰনেটত বিচাৰ কৰিলে। কিন্তু এই অনুসন্ধানত ভাইৰেল পোষ্টটোৰ গ্ৰাফিকত কৰা দাবীৰ সমৰ্থনত কোনো সংবাদ, সাক্ষাৎকাৰ বা ভাষণ পোৱা নগ’ল। তাৰোপৰি, প্ৰধানমন্ত্ৰীৰ চৰকাৰী সামাজিক মাদ্যমৰ একাউণ্টসমূহো পৰীক্ষা কৰি এনে কোনো বক্তব্য বা গ্ৰাফিক শ্বেয়াৰ কৰা হোৱা দেখা নগ’ল।
পৰৱৰ্তী সময়ত আমি নতুন UGC নিয়মাৱলী সন্দৰ্ভত শেহতীয়া ঘটনাৱলী পৰ্যালোচনা কৰি ২৯ জানুৱাৰী তাৰিখে, দ্য হিন্দু (The Hindu)ত প্ৰকাশ পোৱা এটা বাতৰি লাভ কৰিলো। এই বাতৰি অনুসৰি, উচ্চতম ন্যায়ালয়ে উচ্চ শিক্ষানুষ্ঠানত সমতা প্ৰচাৰৰ ক্ষেত্ৰত UGC-এ জাৰি কৰা নতুন নিয়মাৱলীৰ প্ৰয়োগ স্থগিত ৰাখে। শীৰ্ষতম আদালতে ইয়াৰ কেতবোৰ বিধান অস্পষ্ট আৰু সম্ভাৱ্যভাৱে অপব্যৱহাৰৰ সম্ভাৱনা আছে বুলি বিবেচনা কৰে। এই নিয়মাৱলীবোৰে ২০১২ চনৰ পৰা বলবৎ হৈ থকা পূৰ্বৰ কাঠামোখন সলনি কৰাৰ উদ্দেশ্যে প্ৰৱৰ্তিত হৈছিল আৰু বিশ্ববিদ্যালয় চৌহদত জাতিভিত্তিক বৈষম্যৰ সমস্যা সমাধান কৰাটো ইয়াৰ মুখ্য লক্ষ্য আছিল।
আদালতৰ এই হস্তক্ষেপ কেই সপ্তাহমান ধৰি চলি থকা প্ৰতিবাদৰ পিছত আহে, বিশেষকৈ সাধাৰণ বা উচ্চ বৰ্ণ শ্ৰেণীৰ শিক্ষাৰ্থীৰ একাংশই এই নিয়মাৱলী জাতিভিত্তিক বৈষম্যৰ সংজ্ঞা অন্যায়ভাৱে নিৰ্ধাৰণ কৰা আৰু ই ইচ্ছাকৃত অভিযোগৰ সৃষ্টি কৰিব পাৰে বুলি অভিযোগ তোলে। এই বিষয়টো যিহেতু পিছপৰা সম্প্ৰদায়ৰ শিক্ষাৰ্থীৰ আত্মহত্যাৰ ঘটনাক লৈ অভিভাৱকসকলৰ দ্বাৰা দাখিল কৰা আবেদনসমূহৰ লগতো জড়িত, সেয়ে প্ৰাতিষ্ঠানিক বৈষম্যৰ বিষয়টো ন্যায়িক পৰ্যালোচনাৰ আওতালৈ আহে।
উল্লেখযোগ্য যে, নতুন UGC নিয়মাৱলী সন্দৰ্ভত সমৰ্থন কৰা বা কোনো পৰিবর্তন নকৰাৰ বিষয়ে প্ৰধানমন্ত্ৰী নৰেন্দ্ৰ মোডীৰ কোনো চৰকাৰী বক্তব্য এতিয়ালৈকে প্ৰকাশ পোৱা নাই। বিষয়টো বৰ্তমান আদালতৰ বিবেচনাধীন অৱস্থাত আছে আৰু উচ্চতম ন্যায়ালয়ে নিয়মাৱলীৰ প্ৰয়োগ স্থগিত ৰাখিছে। সেয়ে প্ৰধানমন্ত্ৰীয়ে এই বিষয়ে নিশ্চিত স্থিতি লোৱা বুলি কৰা যিকোনো দাবী ভিত্তিহীন।
সেয়ে, ক’ব পাৰি যে প্ৰধানমন্ত্ৰী মোডীৰ নামত প্ৰচাৰিত এই ভাইৰেল গ্ৰাফিকটো সম্পূৰ্ণ ভুৱা আৰু বিভ্ৰান্তিকৰ।
